Монгол Улсын шинжлэх ухаан, технологийн салбарт хийгдэж буй судалгаа, хөгжүүлэлтийн ажлын үр дүн, технологийн шийдлийг эдийн засгийн эргэлтэд оруулахад дэмжлэг үзүүлэх, аж ахуй нэгж, хөрөнгө оруулагчдад танилцуулах зорилготой “Шинжлэх ухаан, технологийн салбарт хөрөнгө оруулалт хийх боломж-Судалгаанаас бизнес рүү” сэдэвт долоо хоногийн арга хэмжээг Эдийн засаг, хөгжлийн яамнаас 2026 оны 03 дугаар сарын 30-ны өдрөөс 04 дүгээр сарын 03-ны өдрүүдэд зохион байгууллаа.

   “Судалгаанаас бизнес рүү” арга хэмжээ нь шинжлэх ухаан-үйлдвэрлэлийн хамтын ажиллагааг өргөжүүлэх, түншлэлийг хөгжүүлэх, дэмжих зорилготой юм. Тус арга хэмжээний хүрээнд 2026 оны 04 дүгээр сарын 03-ны өдөр Монгол Улсын Шинжлэх Ухааны Академи болон Монголын Үндэсний Худалдаа, Аж Үйлдвэрийн Танхим хооронд шинжлэх ухаан, үйлдвэр, бизнесийн салбарын хамтын ажиллагааг өргөжүүлэх чиглэлд Хамтын ажиллагааны санамж бичгийг үзэглэлээ.

   Хамтын ажиллагааны зорилго нь шинжлэх ухаан, үйлдвэр, бизнесийн салбарын судалгаа, инновац, түншлэлийг өргөжүүлэх, эрдэмтэн судлаачдын шинэ бүтээл, патент, судалгааны үр дүнг үйлдвэрлэлд нэвтрүүлэх, салбар дундын хамтын ажиллагааг дэмжих, аж үйлдвэрийн өрсөлдөх чадварыг нэмэгдүүлэх, Монгол орны онцлогт тохирсон, байгальд ээлтэй, үр ашигтай дэвшилтэт технологийг нэвтрүүлэх, нөөцийг хэмнэх, хаягдалгүй эдийн засгийг хөгжүүлэхэд орших юм.